Dugang traffic lights ipamutang sa 3 ka intersection sa Mandaue

CEBU, Philippines — Nagplano ang Traffic Management Board sa Mandaue City sa pagbutang og dugang traffic lights sa tulo ka intersections sa siyudad. 

Suma pa sa pangu sa Traffic Enforcement Agency of Mandaue (TEAM) Hyll Retuya nga ang board nisugyot niini nga lakang aron masulbad ang problema sa dagan sa trapiko. Ang maong mga intersections nahimutang sa E.O. Perez Street, C.D. Seno, ug D.M. Cortes Avenue. 

Gipasabot ni Retuya nga ang maong mga lugar walay traffic lights ug makasinate og grabeng kahuot sa dagan sa trapiko matag adlaw ingon man kanunay nga mahitabo ang aksidente. 

“Mao na siya ang atoang priority areas, sagad ana daghan og fatalities during incidents,” suma ni Retuya.

Dugang pa ni Retuya nga nakasinate og kalisdanan ang ilang mga sakop sa pagpatuman sa kahapsay sa trapiko sa lugar ilabi na tungod sa dagku nga mga trucks nga moagi ilabi na diha sa D.M. Cortes Avenue. 

Iyang gihimug-atan ang ka importante sa mga traffic lights sa lugar aron makaabag sa mga enforcers.

Ang gisugyot nga traffic lights maoy dugang sa 14 ka traffic lights nga nahimutang karon sa mga intersection sa siyudad.   Gawas sa bag-ong traffic lights, gitug-an usab ni Retuya nga ang board nagtinguha usab sa pag modernize sa Traffic System sa Mandaue City. —Gikan sa The Freeman MEL    BANAT NEWS