Kasabutan sa pag-promote sa traditional Chinese medicine gilagdaan

CEBU, Philippines — Usa ka kasabotan o memorandum of understanding (MOU) ang gipirmahan sa mga lider sa medical ug academic fields sa Sugbo ug sa China alang sa pagpromote sa traditional Chinese medicine sa health care system sa Probinsya sa Sugbo.

Ang maong kasabotan gihimo sa tinguha sa paghiusa sa tradisyonal ug moderno nga pagpanambal o maapil ang Traditional Chinese Medicine (TCM) ngadto sa conventional medical education sa Sugbo ug pagpalapad sa kaalam alang sa paghiusa sa kinaraan ug modernong pagpanambal.

Giduso usab sa maong MOU nga ang duha ka habig boluntaryo nga makahatag og pinansyal o resource investments lakip na ang mga imprastraktura, ekipo ug uban pa alang sa exchange programs ug training initiatives.

Mipirma sa kasabutan sila si Professor Li Candong, President sa Fujian University of Traditional Chinese Medicine (FUTCM); Dr. Qi Ming, President sa Philippine Traditional Chinese Medicine (PTCM); Dr. Daniel A. Ariaso, Presidente sa Cebu Normal University-Vicente Sotto Memorial Medical Center College of Medicine Consortium (CNU-VSMMC); Dr. Gerardo M. Aquino Jr., hepe sa Vicente Sotto Memorial Medical Center (VSMMC); ug Ma. Teresa Iñigo, Director General sa Philippine Institute of Traditional and Alternative Health Care (PITAHC).Ang maong MOU epektibo sulod sa tulo ka tuig. 

Ang maong kasabotan gipirmahan atol sa gihimong Gala Night niadtong Pebrero 14 didto sa Capitol Social Hall, human sa tulo ka adlaw nga Cebu Health Summit sa Traditional Medicine nga gitambongan sa mga medical nga eksperto gikan sa China, South Korea ug India. —MEL BANAT NEWS