Nanghikap gidakop

CEBU, Philippines — Nabalhog sa prisuhan atol sa Valentine's Day ang usa ka 35-anyos nga lalakeng technician human siya gidakop kay giingong nanghikap sa pribadong parte sa lawas sa usa ka 16-anyos nga dalagita diha sa F. Cabahug, Barangay Kasambagan, siyudad sa Sugbo kagahapon sa buntag, Biyernes, Pebrero 14, 2025.

Ang suspek mao si alyas Joe, 35, dunay kaipon, technician ug taga Laray II, Barangay Buanoy, Lungsod sa Balamban.

Samtang ang biktima mao ang 16-anyos nga dalagita, Grade 7, nga dunay kaipon ug nagpuyo sa Barangay Banilad, Cebu City.

Sa imbestigasyon sa Mabolo Police Station 4 Cebu City Police Office nga ang suspetsado gidakop pinaagi sa citizen arrest.

Ang biktima nireklamo ngadto sa iyahang live-in partner labot sa law-ay nga gibuhat kaniya sa suspetsado.

Gibutyag sa menor de edad nga biktima nga samtang nagbarog siya aron mokuha unta sa iyahang cellphone kalit nibutho ang suspek ug gihikap ang iyahang kinatawo.

Tungod niini, gidakop ang suspetsado ug gidala sa Mabolo Police Station.

Kasong Acts of Lasciviousness in Relation to Republic Act 7610 ang kasong ipasaka batok sa suspetsado. — IBM BANAT NEWS