Porn sites gustong ipa-block dinhi sa Cebu City

CEBU, Philippines — Sa pagkatap sa gitawag nga “digital revolution” ang Konseho sa Dakbayan sa Sugbo nanawagan alang sa pagpalig-on batok sa access sa porn sites nga gituohang maoy hinungdan nga daghang mga bastos ug immoral nga mga tawo karon.

 Atol sa regular nga sesyon, ilang gipatawag ang Cebu City Police Office (CCPO) aron palig-onon ang ilang kampanya batok sa cyber-pornography kay matud pa sayon na kaayo kini karon ma access diha sa internet.

Sa samang sesyon, nanawagan ang konseho nga ang mga public wi-fi services sa dakbayan  ipang-block ang bisan unsang porn site. Gidasig sab ang mga pribadong Wi-Fi providers nga sundon kini.

Aron mas palawman ang diskusyon, usa ka executive session ang gitakda sa konseho karong Marso 5, 2025.

Gihangyo usab sa konseho si Mayor Raymond Alvin Garcia nga ipatuman ang Cebu City Inter-agency Council batok sa Human Trafficking ug Online Sexual Abuse and Exploitation of Children.

Kini nga panawagan mitumaw human sa privilege speech ni Konsehal Pastor “Jun” Alcover, kinsa naghisgot sa pagsaka sa teknolohiyang pang-impormasyon nga nag-uban sa industriyal nga rebolusyon.

Matud niya, samtang nasinati sa katawhan ang ikaupat nga industriyal nga rebolusyon, nahimo usab kining plataporma sa paghimo og krimen.

Ingon nga pruweba, iyang gisubli ang balita sa Banat News niadtong Disyembre 28, 2024, ang igsoong publikasyon sa The Freeman, nga midala og pamahayag nga usa ka 8-anyos nga batang babaye gitabangan og lugos sa mga menor de edad nga naka access sa porn site didto sa Toledo City pinaagi sa Piso wi-fi.

Dugang pa niya, base sa maong balita sa Banat News, ang Toledo Police Station nahingangha sa maong hitabo kay tulo ka menor de edad ang nalambigit sa pag-abuso sa biktima.

 Matod ni Alcover, nakapukaw kini sa iyang kabalaka nga kining modernong teknolohiya nakapasayon naman hinuon pag-access sa mga kabataan bisan kadtong mga gidili ug immoral.

“Dali ug yano nalang kaayo ma-access, or masud sa mga menor de edad ang porn sites sa internet,” matud ni Alcover.

“Kini usa ka dakong kabalaka kay halos kita tanan naggamit na sa social media, menor de edad man o hamtong; Ang tanan adunay access sa social media,” matud ni Alcover. Matud niya, usa nalang ka click, makasulod na dayon og porn sites ang si bisan kinsa apil mga bata.

Iyang gipahinumdoman nga dunay probisyon nga Seksyon 3 sa Republic Act 10364 nga nagdili sa pornograpiya dinhi sa nasud.

Gusto niya nga molihok ang katilingban ilabi na ang Simbahan aron matabangan ang kagamhanan sa dakbayan sa pagbatok ani.

“I call on the religious sector of the Philippines. We are Catholics, and we should do something about this, not just let our churches remain silent. This is a question of moral decay,” dugang pa ni Alcover.

Si Konsehal Philip Zafra sa iyang bahin miingon nga panahon na aron ang nasudnong kagamhanan magpatuman og lig-on nga mga lakang batok niini nga isyu.  IBM BANAT NEWS