P35,000 gisugyot nga charter day bonus sa mga kawani sa Cebu City Hall

CEBU, Philippines — Giusbawan sa Cebu City Council ang gisugyot nga charter day bonus sa mga empleyado sa city hall ngadto sa P35,000 gikan sa P25,000.

Mao kini ang consensus sa konseho atol sa ulahing regular session subay sa resolusyon ubos sa Program on Awards and Incentives for Service Excellence (PRAISE), nga nagsugyot sa paghatag og P25,000 nga insentibo sa tanang regular, casual, ug coterminous nga mga empleyado sa city hall.

Ang maong sugyot unang giduso ni Konsehal Noel Wenceslao, chairman sa committee on budget and finance sa konseho sa siyudad.

 Gipanginahanan usab ni Konsehal Jocelyn Pesquera ang resolusyon sa PRAISE nga nagpakita nga ang siyudad makahatag og labaw pa sa gisugyot nga kantidad.

Samtang si Konsehal Philip Zafra nagkanayon nga kon adunay basehanan ang pag- usbaw kinahanglan nga patas-an kini sa konseho ngadto sa P35,000 ug niduso kini og motion kabahin sa maong tumong nga giaprobahan sa konseho.

Base sa resolusyon sa PRAISE, ang incentive scheme girekomenda ngadto sa mayor sa paghatag og awards o insentibo base sa mga espesyal nga kalamposan, innovative approaches sa assignments, exemplary service ngadto sa publiko, ug recognition sa mga pipila ka mga grupo partikular niini ang mga kalamposan.

Kini subay sa ika-88th  charter day sa siyduad nga nagtumong sa pag-ila ug paghatag og award sa mga empleyado base sa ilang performance, innovative ideas, ug exemplary behavior nga nakatampo sa pagpalambo sa mga operasyon sa gobiyerno.

Ang PRAISE committee nihisgot sa Health Promotion Summit for Barangay Health Workers (BHW) nga gipasidunggan sa Department of Health (DOH) niadtong Agosto 8, 2024.  Gipadayag sa PRAISE ang laing mga mahinungdanong milestones sama sa pag-ila sa siyudad sa National Nutrition Council nga adunay Seal of Compliance sa 2023 Green Banner niadtong Agosto 9, 2024 ug pag-ila isip top 3 Local Government Unit (provincial ug HUCs category) nga adunay pinakataas nga coverage sa fully immunized children.

Gikataho nga si Cebu City Mayor Raymond Alvin Garcia nipahibawo nga posibleng makadawat og P25,000 nga bonus ang mga empleyado sa city hall alang sa kasaulogan sa charter day sa siyudad karong Pebrero 24, 2025.

Ang gisugyot nga kantidad pareho sa giaprobahan sa city council sa niaging tuig isip charter day bonus sa mga empleyado samtang ang mga job order nakadawat og P5,000 isip gratuity pay.  BDB BANAT NEWS