Nagkalain-laing baligya nabalik na diha sa Talisay City Hall

CEBU, Philippines — Nabalik na usab ang nagkalain-laing baligya diha sa atubangan sa Talisay City Hall diin alang kini sa kasaulogan sa Valentines’ Day karong tuiga.

Si Mayor Gerald Anthony “Samsam” Gullas, Jr. nagkanayon nga makita na usab ang mga gagmay nga negosyante sa pagpresentar sa ilang baligya diin nagsugod sila sa pagladlad sa ilang mga baligya niadtong Pebrero 13, 2025 ug hangtud sa 23 niining buwana.

Nagkanayon si Gullas nga adunay nagkalain-lain nga kalingawan ang masaksihan sa mga mosuroy matag gabii.

Samtang sa pagsaulog usab sa Valentines adunay gipahigayon nga dress code sa mga trabahante sa city hall.

Ang nagsul-ob og puwa nagpasabot nga adunay forever, ang nagsul-ob og yellow dili sigurado, ang puti single ug kontento, ang green motuo sa gugma ug andam mosulod sa relasyon, grey naglaom nga mobalik ang nawala niya, pink naghuwat og adunay maabot, black dili na sa gugma ug blue naay forever.

Matud ni Gullas nga lima ka tuig na nila kini nga gihimo ug nakita ang ka alegre sa pagsaulog sa adlaw sa kasing-kasing.

Si Gullas niluwat kini og kamandoan kalabot niini nga gisunod usab sa mga trabahante.

Sa laing bahin, si Jonathan Tumulak, pangulo sa City of Talisay-Traffic Operation Development and Authority (CT-TODA) nibutyag nga gi-monitor nila ang mga kan-anan nga posibleng dagsaon sa mga tawo sa pagsaulog sa Valentines’ Day.

Matud ni Tumulak nga gipanagan-an na nila kini samtang nagsaulog sa adlaw sa kasing-kasing.

Padayon gihapon sila sa pagpahimangno nga adunay okasyon o wala mas maayo nga pasensiyoso diha sa dalan samtang magmaneho.

Likayan usab ang pag-inom og ilimnong makahubog samtang magmaneho.  BDB BANAT NEWS