Engkwentro pag-serve sa warrant, 16 anyos naangol
CEBU, Philippines — Niresulta sa engkwentro ang pag-implementar sa Argao Municipal Police Station sa warrant of arrest nga niresulta sa pagkaangol sa 16 anyos nga bata diha sa Sitio Baclao, Barangay Mabasa, Lungsod sa Argao kagahapon sa kadlawon, Pebrero 13, 2025.
Nadakpan hinuon sa kapulisan ang subject sa warrant of arrest nga si Archie Zamora Delos Reyes, 37, nagpuyo sa lugar, samtang nalandig sa tambalanan ang 16-anyos nga lalakeng kauban niini nga taga Barangay Langtad, Lungsod sa Argao.
Sa impormasyon sa Argao Municipal Police Station nga pinaagi sa pagpangulo sa ilang hepe nga si Police Major Janus Giangan si Delos Reyes dunay kasong kalapasan sa Section 5 ug 11, Article II sa Republic Act 9165 diin ang Regional Trial Court Branch 94, 7th Judicial Region, Argao.
Sa pag-abot sa mga polis didto nakabantay ang duha ug giingong giunhan sila pagpusil hinungdan nga nibawos ang mga polis.
Nadakpan si Delos Reyes apan ilang napusilan ang 16-anyos kinsa gidala dayun sa Isidro C Kintanar Memorial Hospital.
Na-recover sa kapulisan kang Delos Reyes ang usa ka KG9 submachine gun, magazine nga dunay lima ka bala ug usa ka putos sa gituohang shabu.
Samtang na-recover sab gikan sa SOCO Team sa crime scene ang usa ka kalibre .45 pistola ug magazine nga dunay upat ka bala, ug lima ka fire cartridges niini. (BANAT NEWS)
- Latest
