16 ka armas nasakmit sa MCPO

CEBU, Philippines — Nakasakmit na og 16 ka armas ang Mandaue City Police Office (MCPO) sukad sa pagsugod sa pagpatuman sa Comelec gun ban niadtong Enero 12, 2025 matud pa ni Police Lieutenant Colonel Mercey Villaro, tigpamaba sa MCPO, kagahapon, Pebrero 13, 2025.

Hangtod karong Pebrero 13, 2025, duha niini nakuha sa mga checkpoint sa Commission on Elections (Comelec) sa dakbayan, samtang ang 14 gikan sa mga gipahigayon nga police operations.

Kadaghanan sa mga nakumpiskar nga armas walay gipakitang dokumento nga nagmatuod nga legal ang paghupot niini. Kasagaran sa mga nakuha nga armas kay paltik o unregistered firearms.

Si bisan kinsa nga madakpan nga nagdala og armas o ubang deadly weapons mahimong makasuhan og criminal charges ug masilotag  pagkapriso og dili moubos sa usa (1) ka tuig ug dili molapas sa unom (6) ka tuig.  

Matud ni Villaro paningkamot nila  nga  hapsay ug luwas ang 2025 National and Local Elections karong Mayo 12. (BANAT NEWS)