Tagdumala sa CBRT gipatawag sa konseho sa Cebu City

CEBU, Philippines — Gipatawag sa Cebu City Council ang Cebu Bus Rapid Transit (CBRT) management alang sa hingpit nga diskusiyon sa kinatibuk-ang kaluwasan kalabot sa pagtukod sa maong mass transportation project.

Ang maong lakang gumikan kini sa privilege speech ni Konsehal Noel Wenceslao atol sa ulahing regular session diin ang mga representante gikan sa Department of Engineering and Public Works (DEPW), CBRT contractor ug Department of Transportation gihangyo usab nga motungha atol sa session.

Gihangyo usab ang contractor ug DOTr nga mahatagan og hinabang pinansiyal ang mga biktima sa nahitabong aksidente.

Si Wenceslao nipahigayon og privilege speech mahitungod sa pipila ka mga disgrasya nga naglambigit sa removable barriers nga gibutang diha sa Osmeña Boulevard, usa ka bahin sa rota sa CBRT.

Sayo pa, si Cebu City Mayor Raymond Alvin Garcia nimando sa temporaryo nga pagtangtang sa mga lane separator alang sa safety concerns. Subay niini, si Wenceslao nipadayag nga personal niyang nasaksihan ang aksidente sa maong dapit niadtong Lunes sa gabii.

Nabantayan nga ngit-ngit ang lugar gumikan sa kakuwang sa suga ug mga reflector.

Giingong bisan sa pipila ka mga taho sa mga motorista nga nabangga sa mga barrier ang nikatap apan usa lang ka aksidente ang natala sa record sa kapolisan.

Matud ni Wenceslao nga kinahanglang adunay obligasyon ang management sa CBRT nga ipatuman pagsiguro sa kaluwasan sa mga motorista.

Nunot niini, ang konseho sa siyudad nipalabang usab og resolusyon nga nag-awhag sa pagbutang og safety measures sa maong lugar ingon man ang pagtangtang sa barrier tungod kay kini giisip gihapon nga dili kinahanglan sa pagkakaron.

Atol sa diskusyon, si Konsehal James Anthony Cuenco nagkanayon nga bisan pa sa direksiyon sa pagtangtang sa barriers, ilang giangkon nga ang contractor sa proyekto nagpabaya sa ilang responsibilidad sa pagsiguro sa kaluwasan samtang nagpadayon ang civil works.

Matud ni Cuenco nga kinahanglang manubag usab ang CBRT management sa danyos sa mga na-ospital.

Sa samang diskusiyon, si Konsehal Philip Zafra nagkanayon nga kinahanglan ang mas hugot nga koordinasyon tali sa CBRT management ug lokal nga kagamhanan sa siyudad. (BANAT NEWS)