P42M nga wastewater treatment facility sa CCJ sugdan na

CEBU, Philippines — Sugdan na ang pagtukod sa P42 milyones nga wastewater treatment facility alang sa Cebu City Jail sa Barangay Kalunasan diin kagahapon sa buntag gipahigayon na ang ceremonial groundbreaking sa maong proyekto.

Ang maong kalihokan gipangulohan ni Cebu City Mayor Raymond Alvin Garcia, kauban sila Konsehal Francis Esparis ug Joel Garganera.

Ang mga opisyal sa Bureau of Jail Management and Penology (BJMP), Department of Engineering and Public Works ug opisyales sa barangay usab sa nahisgutang kalihokan.

Gilaoman nga ang maong proyekto mahuman  kini sulod sa 510 ka adlaw.

Sa iyahang mensahe sa maong kalihokan, si Garcia nagkanayon nga ang proyekto dugay na nga wala matuman.

“Makapungot ug makalagot ba, nga wa aksyoni, pila katuig, puros estorya samtang nag-antos ang atong katawhan dinhi sa Barangay Kalunasan”, matud ni Garcia ug nidugang nga ang proyekto lima na ka tuig nga wala napatuman.

Apan si Garcia wala kini mo detalye sa hinungdan sa pagkalangan sa proyekto ug matud niini nga iyang nahinumduman nga ang maong proyekto unang gipresenta isip usa ka espesyal  nga proyekto ug pipila na ka mga komitiba ang giumol aron tutokan ang pag-uswag niini.

Ug nahitabo ang bidding sa proyekto dihang nilingkod na siya isip mayor sa Dakbayan sa Sugbo.

Sa pagkakaron, ang maong jail facility walay sestema sa pag-treat sa hugaw sa tawo sa tanang dormitoryo niini.

Si Garcia nagkanayon nga gibana-banang adunay 5,000 ka piniriso ang anaa karon sa jail facility.

Matud ni Garcia nga ilang sigurohon nga mahuman ang proyekto sa tukmang panahon diin adunay gipirmahan na nga kontrata ug manubag ang contractor kong malangan ang proyekto.

Gikataho nga niadtong tuig 2018, ang Office of the Cebu City Environment and Natural Resources (CCENRO) nakadawat og report/reklamo kabahin sa baho  gikan sa Cebu City Jail Male Dormitory nga nakahatag og kabalaka sa panglawas sa mga piniriso ug sa mga residente sa palibot sa facility.

Niadtong Pebrero 2024, ang Cebu City Council nihangyo sa executive department sa Cebu City Government nga unahon ang pagtukod sa wastewater treatment facility sa Cebu City Jail diin dugay na kaayo ang maong proyekto ug wala pa mapatuman. (BANAT NEWS)