Kapolisan sa Talisay mopatuman og curfew karong adlawa

CEBU, Philippines — Ang kapolisan sa Dakbayan sa Talisay mopatuman  og curfew atol sa pagsaulog sa Valentines’ Day  karong adlawa.

Kini ang gibutyag ni Police Lieutenant Colonel Epream Paguyod, hepe sa kapolisan sa siyudad.

Giklaro ni Paguyod nga ang curfew alang kini sa mga menor de edad nga padayon gihapon nga maglaroy-laroy sa lawom na nga kagabhion.

Ang kapolisan sa Dakbayan sa Talisay nilibot na sa mga motel, pension house, hotel ug mga resort diin ilang gipahinumduman ang management nga gidili ang pagpasulod sa mga menor de edad ilabi na ang kuyog dili nila kabanay.

Matud ni Paguyod nga pagprotekta ang ilang gihimo ngadto sa mga menor de edad nga dili sila mabiktima sa human trafficking.

Nipasidaan ang kapolisan nga likayan ang ngit-ngit nga dapit tungod kay mogara ang mga tulisan diin mao kini ang ilang paborito nga mohimo sa modus.

Nanghinaot si Paguyod nga saulogon ang adlaw sa kasing-kasing nga malinawon.

Sa laing bahin, tabla kong mogawas man ang numero sa ilegal swertres nga “214” sa karong adlawa.

Kini human ang usher nga nag-isyu niini ang nadakpan sa kapolisan sa Siyudad sa Naga.

Ang nasikop mao si Francis Pando, 23-anyos, taga Barangay North Poblacion, Siyudad sa Naga. Ang kapolisan nihimo sa operasyon kalabot sa ilegal nga swertres sa dapit ug ilang naabtan ang suspetsado.

Ang maong usher nakuhaan og usa ka ballpen, kwarta nga P170 nga kita sa pag- isyu og numero ug usa ka stub nga adunay target nga numero “214”.

Ang 214 naila nga masabot nga “I Love You” naatol kini sa kasaulogan karon sa Valentines’ Day.

Samtang walo ka tawo usab ang nagtingkagol sa bilanggoan human nasakpan nga nagpapusta og ilegal nga swertres diha sa lungsod sa Liloan.

Laing usa ang nadakapan nga usher diha sa Barangay Banhigan, Lungsod sa Badian nga si Antonio Silvano, 41-anyos samtang unom ang nasikop sa duwa nga tong-its sa Dakbayan sa Talisay.

Gihimo ang operasyon diha Sa sitio Santa Cruz, Barangay Mohon diin nasikop sila si  Noel Cabusas Mier, 25-anyos; Reynaldo Capili, 33-anyos ug Erda Mae Abangan, 25-anyos.

Nasikop usab diha sa Purok Santan, Barangay San Roque sila si Donna Claire Banzon, 26,; Elvielyn Padilla, 30, ug si Jerry Garciq, 47. (BANAT NEWS)