Taskforce alang sa pagpaayo sa simbahan sa Sibonga giumol

CEBU, Philippines — Miumol og task force si Gobernador Gwendolyn Garcia alang sa pagpaayo sa Nuestra Señora del Pilar Parish Church sa lungsod sa Sibonga, habagatang Sugbo.

Ang Task Force Nuestra Señora del Pilar Complex Rehabilitation and Restoration maoy mosiguro nga striktong masunod ang mga termino ug kondisyon tali sa Probinsya sa Sugbo ug sa Tourism Infrastructure and Enterprise Zone Authority (TIEZA) alang sa pagpaayo sa maong simbahan nga nakaangkon og dakong kadaot human sa bagyong Odette.

Si gobernador Gwendolyn Garcia miluwat sa memorandum no. 16-2025 alang niini diin ang chairman sa maong task force mao si Dr. Eleazar Bersales ang consultant sa Kapitolyo sa heritage ug museum kinsa usa ka miyembro sa advisory council sa National Commission for Culture and the Arts.

Ang mga miyembro sa task force mao sila si Sibonga Mayor Mariano Laude; Fr. Brian Brigoli, ang chairman sa heritage commission sa Archdiocese of Cebu; Provincial Engineer Hector Jamora; Fr. Florina Tonde kura paruko; Capitol consultant Arch. Ma. Theresa Javier; environmental planner June llyn Terado-Esteban ug Provincial Tourism Officer Maria Lester Ybañez, ug uban pa.

Ang Probinsya sa Sugbo ug ang TIEZA una nang mipirma og kasabotan alang sa pagpaayo sa simbahan sa Sibonga, kon diin ang TIEZA nga sakop sa Department of Tourism (DOT) maoy mogahin og P110 million nga pundo alang sa maong proyekto.

Ang Kapitolyo usab maoy motan-aw sa implementasyon sa maong restoration project subay sa guidelines nga gilatid sa balaod. (BANAT NEWS)