Soco niawhag nga isuspenso ang umento sa SSS contribution

CEBU, Philippines — Miawhag si bokal Glenn Anthony Soco ngadto sa Social Security System (SSS) nga suspensohon ang pagpatuman og umento sa rate sa kontribusyon sa mga miyembro sa maong ahensya.

Ang SSS miumento og 14% ngadto sa 15% sa kontribusyon sa mga miyembro sugod Enero 2025 subay sa Republic Act 11199 o ang Social Security Act of 2018.

Apektado sa maong umento ang mga trabahante sa pribadong sektor, domestic workers, self-employed workers, voluntary members ug land-based overseas Filipino workers.

Sumala ni Soco, ang maong pagsaka sa rate sa kontribusyon dako og epekto sa publiko ilabina sa nagbayad sa SSS sanglit mahimo kini nga dugang bug-at nga bayrunon ug kalisod sa mga miyembro, ilabina sa nagsaka nga presyo sa mga palaliton.

Dugang ni Soco, dili lang mga empleyado ang mabug-atan sa bayrunon, apil na pud ang mga employers nga adunay gahin sa binulan nga kontribusyon sa SSS.

Matud sa bokal sa sixto distrito, nga dako sab ang danyos niini ngadto sa mga gagmay nga patigayon o mga micro, small, medium enterprises.

Ang maong lakang sumala sa bokal dili direkta nga mosaka ang benepisyo sa mga miyembro kon adunay umento sa ilang kontribusyon.

Gipunto usab ni Soco nga adunay pag-awhag og transparency sa paggamit sa pondo sa SSS lakip na ang pagpatuman sa koleksyon ug maayong operasyon ug pagdumala nga maoy angay totokan sa maong ahensya. (BANAT NEWS)