Barriers sa bus lane sa Osmeña Blvd gipatangtang

CEBU, Philippines — Gimandoan ni Cebu City Mayor Raymond Alvin Garcia ang nagdumala sa Cebu Bus Rapid Transit kon CBRT nga tangtangon ang mga barriers sa bus lane diha sa Osmeña Boulevard human sa sunod-sunod nga aksidente sa mga motorsiklo.

Tungod sa sunod-sunod nga aksidente gi-inspection kagahapon ni Garcia ang giingong accident prone CBRT lane uban ang manager sa CBRT nga si Engr. Norvin Imbong.

Nakita nila ang peligro nga namugna sa maong barrier hinungdan nga nakahukom ang mayor nga ipatangtang dayon kini.

Niadtong Lunes adunay mga nag motor nga nisubay sa Osmeña Boulevard nga naaksidente sa may barrier ug hapit pa kini maigo sa niagi nga sakyanan.

Luwas ra hinoon ang mga motorista nga nalambigit sa sunod-sunod nga aksidente

Giklaro ni Garcia nga ang maong mga barriers gipamutang aron timailhan nga way pribadong sakyanan nga tugtan nga makasulod sa bus lane.

Hinuon bisan og tangtangon kini ibalik ra gihapon kini og taud sa higayon nga hapit na makompleto ang proyekto.

Nagkanayon si Garcia nga gikinahanglan gyud ang barrier tungod kay mao kini ang mag separate sa bus gikan sa ubang lanes sa karsada.

Samtang giklaro sa mayor nga walay resources sa gobyerno ang nausik sa pagtangtang sa maong mga barriers tungod kay ang gihimo mao man lang ang pagtangtang niini nga gipang screw lang sa karsada ug bugtong gasto lang mao ang labor kun sa mga nagtrabaho.

Si Imbong usab nipadayag nga target nga mahuman ang CBRT Project sa sunod buwan na, apan giproseso pa ang pamaagi sa pagkuha og bus nga mo operate sa CBRT. (BANAT NEWS)