Kapin sa 30 ka police outpost gipahiluna sa dakbayan sa Sugbo

CEBU, Philippines — Mikapin sa 30 ka mga police outpost ang gibutang sa Cebu City Police Office ug Police Regional Office Central Visayas sa nagkadaiyang dapit sa siyudad sa Sugbo isip kabahin sa bag-ong programa nga gisuportahan sa local nga kagamhanan sa dakbayan sa Sugbo.

Matud pa ni CCPO Director Police Col. Enrico Figueroa, ang maong lakang gitumong aron mapadali ang pag responde sa mga police sa mga panghitabo sa siyudad.

Pinaagi niini mas mapadali ra usab ang pagduol sa mga tawo kay anaa ra man sila sa daplin sa karsada ug labaw sa tanan mahadlok na ang mga criminal tungod sa presensiya sa mga otoridad.

Gibutyag ni Figueroa ang maong mga outpost adunay duha ka personnel nga gidestino ug kompleto kini sa kagamitan sa komunikasyon apil na ang blinker, megaphone ug hand held radio.

Kining maong lakang sa kapolisan subay usab sa kamanduan ni Cebu City Mayor Raymond Alvin Garcia nga palapdan pa ang police visibility.

Ang CCPO nahinangop usab sa gihatag nga suporta sa LGU ilabi na sa ilang nadawat nga mga sakyanan alang sa kapolisan. (BANAT NEWS)