Duha ka notado nga snatcher nadakpan sa barangay Talamban
CEBU, Philippines — Duha ka mga notadong snatcher ang nadakpan sa kapolisan sa Talamban Police Station 8 sa Cebu City Police Office pinaagi sa pag-abag sa katawhan human nanglabni og kwentas sa may ML Quezon Street, Barangay Talamban, siyudad sa Sugbo kagahapon sa buntag, Martes, Pebrero 11, 2025.
Ang mga nadakpan mao sila si Jackson Anggot Corpuz, 39 anyos ug James Cristupa Carpio, 28 anyos, pulos nagpuyo sa Sta. Cruz, Barangay Labangan, Zamboanga.
Samtang ang biktima mao si Xavier Ranay Cabanit, 76 anyos, nagpuyo sa Barangay San Jose ning siyudad.
Nagkanayon si Police Major Alvino Enguito, Hepe sa Talamban Police Station 8 ang biktima nagpa laboratory ug ang usa sa mga suspetsado nagpakaaron ingnon sab nga magpa laboratory pero iyahang kauban nga nag motor nag-atang na daan.
Paglabay sa pila ka gutlo gilabni dayon sa suspetsado ang kwentas sa biktima nga dunay pendant nga nagkantidad og P120,000.
Nigukod ang biktima ug natunong sab nga dunay mga police nga gikan nag PFT ug naa say police nga na-assign sa outpost ug nitabang sab ang mga tawo hinungdan nga nadakpan ang duha ka mga suspetsado.
Na-recover sa kapolisan ang kwentas apan ang pendant wala na igkita ug sigon pa sa mga suspetsado nalabay kini nila samtang nisuway og sibat.
Nakuhaan sab ang mga suspetsado og 357 nga armas nga dunay duha ka buhing bala.
Tukma nga kaso ang gikatakda nga ipasaka batok sa mga suspek. (BANAT NEWS)
- Latest
