Cebu City mopasiugda og concert karong Valentine’s Day

CEBU, Philippines — Gilaoman nga hugpaan na usab sa mga tawo ang Cebu City Sports Center atol sa adlaw sa mga kasing-kasing karong Pebrero 14, 2025 diin gitakdang mopahigayon og concert sa maong adlaw ang Sweetnotes.

Kini ang gipahibalo ni Mayor Raymond Alvin Garcia atol sa gipahigayon nga press conference kagahapon.

Matud ni Garcia nga human sa malamposon nga Sinulog, karong umaabot Biyernes  laing dako nga concert ang ipahigayon diin mas daghan na ang makasaksi niini tungod kay dako nga dapit sa track oval ang masudlan sa mga tawo. Ug aron makontrolar ang mga tawo aduna gihapon sila’y mga ipagawas nga mga ticket ug ipahibalo usab unya niya kong asa kini makuha.

Gipahibalo ni Garcia nga ablihan nila og sayo ang mga gates aron sayo usab makasulod ang mga tawo gumikan kay aduna pay mag-una nga mo-perform sa dili pa ang Sweetnotes.

Hugot nga seguridad ang ipatuman atol sa maong concert diin nikuha sila og private security firm nga motabang ug anaa usab ang kapolisan.

Sa laing bahin, sayo nga gisaulog sa Talisay City Jail Male Dormitory ang adlaw sa mga kasing-kasing.

Apan ang ilang pagsaulog ilang gigahin ngadto sa kalikupan ug sa kabataan.

Ang mga sakop sa Talisay City Jail Male Dormitory nihimo og reading ug feeding program sa mga tinun-an sa Maghaway Elementary School diin 200 ka grade 2 ug kindergarten ang nakapahimulos niini.

Ang kalihokan naghatag og kahigayonan sa mga bata sa pagbasa og may pagtulon-an nga estorya ingon man giestoryahan sila sa makadasig nga estorya sa mga sakop sa BJMP Talisay.

Gawas niini, nagpahigayon usab sila og mangrove planting.

Ang mangrove o bakhaw dako kini og tabang sa pagprotektar gikan sa bawod ingon man mao kini ang paboritong itlogan sa mga isda. (BANAT NEWS)