Kapitolyo mohatag og premyo sa makadaug sa Provincial Meet
CEBU, Philippines — Hatagan og premyo sa Probinsya sa Sugbo ang mga atleta nga makadaog sa karon nga tuig sa Cebu Provincial Sports and Cultural Meet.
Atol sa pagbukas sa maong kalihokan niadtong Peberero 9, sa syudad sa Naga, si Gobernador Gwendolyn Garcia mianunsyo nga ang Kapitolyo mohatag og premyo sa mga makadaog sa maong kalihokan.
Sa paugnat sa kusog, ang first place makadaog og P50, 000, ang second place sa P40, 000 ug P30, 000 sa third place.
Samtang ang sa cultural event, makadawat gikan sa Kapitolyo og P20, 000 ang first place, P10, 000 sa second place ug P5, 000 sa third place.
“May I remind you, sangka ug paugnat man gyod nis kusog: be humble in victory and gracious in defeat. Nasayod tang tanan, whether you will come out the victors or the losers, you have done your very best, and for me, that is enough for the Province of Cebu,” matud ni Garcia ngadto sa mga tinun-an ug ubang partisipante.
Ang gobernador sa iyang mensahe nagkanayon nga buot gyud niya nga iipon ang mga partisipante sa mga province division ug sa mga city division sa provincial meet ug cultural event, aron magsangka ug makapili sa pinakamaayo.
“Ang atong mga athletes, whether they come the city or from towns, maanindot gayod ang usa, so that we can get the best of the best, aron puhon sa palarong pambansa, dili na maglahi-lahi ang athletes na champions sa mga siyudad bisan gikan sa Cebu sa province. basin og mag-usa ta, basig mo taas taas atong rankings puhon sa Palarong Pambansa” matud ni Garcia.
Ang Cebu Provincial Sports and Cultural Meet giapilan kini sa 10,494 ka mga atleta gikan sa 44 ka munisipyo uban sa 2,487 coaches ug chaperones, 755 technical officials, ug 2,280 support personnel.
Ang kalihokan nagsugod sa Pebrero 9 ngadto sa14 sa siyudad sa Naga diin co-host ang Minglanilla, San Fernando, ug Carcar.
Ang provincial meet, adunay 24 ka kategorya sa sports ug aduna usab 10 ka cultural competitions.
Ang mga makadaog maoy ipadala sa Central Visayas Regional Athletic Association (CVIRAA). (BANAT NEWS)
- Latest
