Mga nasunogan nakadawat og tabang pinansyal

CEBU, Philippines — Nakadawat og P10,000 nga pinansiyal nga ayuda gikan sa buhatan ni Senador Bong Go ang 677 ka pamilya nga nasunogan sa siyudad sa Mandaue.

Gihimo ang maong pag-apod-apod pinaagi sa City Social Welfare and Services Office (CSWSO) nga gisaksihan usab ni Mandaue City Mayor Glenn Bercede ug mga sakop sa konseho.

Dugang nadawat sa mga nasunogan sa dakbayan mao ang foodpacks nga gitunol usab ngadto kanila atol sa maong kalihokan.

Nunot niini gipadayag ni Mayor Bercede ang pagpasalamat kang senador Bong Go tungod sa pagpakabana sa gatusan ka mga biktima sa sunog sa dakbayan.

Lakip sa mga biktima nga nakadawat sa maong kantidad kadtong mga tag-iya og panimalay sa sitio Paradise sa Barangay Looc, Under the Bridge sa Barangay Looc ug uban pa.

Nasayran pipila kanila ang kasamtangan na karon nga gipahiluna sa kagamhanan sa dakbayan sa Pasilong Center nga nahimutang duol sa Cebu International Convention Center (CICC) nga mao na karon ang nagsilbi nilang pinuy-anan.

Samtang laing nakadawat og tag P10 mil nga ayuda mao ang mga pamilya nga nasunogan sa lungsod sa Minglanilla ug Dakbayan sa Talisay.

Natigayon ang pagpanghatag sa hinabang diha sa Sports Academy sa siyudad sa Talisay niadtong Sabado.

Ang mga benepisyaryo nasunogan sa ilang pinuy-anan niadtong miaging tuig.

Ang hinabang gipaagi sa buhatan sa National Housing Authority (NHA) pinaagi sa programa nga Emergency Housing Assistance Program (EHAP) nga gikan sa panudlanan ni Go. Nagpa raffle sab kini og sapatos, bisekleta ug cellphone.

Hinuon si Go pakyas sa pagtambong sa kalihukan gumikan sa kakulian sa iyang panglawas.

Nakighimamat lang siya sa katawhan pinaagi sa pagtawag online ug siya nanghinaot nga dili na sila makasinati sa dili maayo nga panghitabo. (BANAT NEWS)