Mga riders planong gamiton isip first responders

CEBU, Philippines — Giplanohan sa bag-ong chairperson sa Cebu City Disaster Risk Reduction Management Council (CCDRRMC) nga si Ramil Ayuman nga gamiton ang mga delivery riders ug mga accredited nga habal-habal drivers isip mga first reponders.

Atol sa ilang tigum niadtong miaging semana ilang gihisgutan ang mga pamaagi aron mapalambo ug mapadali ang pagresponde sa mga emerhensya.

Gipasabot ni Ayuman nga nangita sila og mga pamaagi nga mapatuman ang practical nga pamaagi sa pagtubag sa mga emerhensya ilabi na panahon sa kalamidad.

“We are also planning to nga kaning mga Move it, Grab ug unsa pa na diha, atong e-empower, e-train para mag first responder pud nato, mao nay atong aim, nitial nga himuon,” Suma pa ni Ayuman.

Kini tungod kay ang motorsiklo mao ang labing paspas nga pamaagi sa transportasyon ug mas dali nga makaresponde sa mga emergency cases.

Una niini ang habal-habal drivers ug delivery riders ang gisaaran og free accident insurance ni mayor Raymond Garcia agi og pahalipay sa ilang serbisyo ngadto sa mga Sugbuanon ilabi na niadtong panahon sa pandemic.

Dugang pa ni Ayuman nga tan-awon usab sa CCDRRMC unsay ilang mahimo kabahin sa epektibo nga paggamit sa 911 human siya makadawat og tahu nga gidawat kini sa ilang base sa Manila inay nga direkta nganhi sa Cebu City nga molanat pa og oras ug panahon una sila maka responde.

"Atong gihangyo sad ang in-charge sa 911 unsa ka effective ang 911 diri kay nakadawat mig feedback nga kung nay manawag adto pas Manila ayha e forward sa Cebu…Unsay angay pa enhance para ani,” segun pa ni Ayuman.

Giplanohan usab niya ang pagbuhi sa paggamit sa analog radio communication.

“Buhion ang analog radio communitation…Karon gud, digital naman ta, pero importante gihapon nato ang analog para daghan tag force multipliers sa ubos, kanang mga ordinary volunteers gusto nato e strengthen nga each barangay daghan tag mga volunteer groups and communicators,” suma pa ni Ayuman.

Si Ayuman gikatakda nga makigtagbo sa ubang miyembro sa CCDRRMC karong Huwebes aron sutaon ang sitwasyon sa ground sa pagkakaron ingon man susihon ang datus kabahin sa sunog, pagbaha ug mga insidente sa landslides kun pagdahili sa yuta. (BANAT NEWS)