Nagkadaghan na ang interesado nga mosagop og Aspin-Utlang
CEBU, Philippines — Naobserbahan sa pangu sa Department of Veterinary Medicine and Fisheries (DVMF) Cebu City nga daghan na sa mga Cebuano ang interesado nga mosagop og mga Aspins kun asong pinoy.
Suma pa ni Dr. Alice Utlang, Cebu City veterinarian nga nagkadaghan ang mga Sugbuanon nga misagop og mga na rescue nga iring, ug iro.
Niadtong tuig 2023 mokabat sa 93 ka mga iring ug iro ang gisagop samtang sa tuig 2024, 204 ka iring ug iro ang nasagop.
Gikalipay ni Utlang ang maong development tungod kay matud pa niya nahatagan og kahigayonan ang mga gi abandonar nga mga hayop nga makabaton og laing higayon sa pagpakabuhi.
“Ang atong adoption is promising. Now, this year, just for the month of January, mga almost 10 ang na-adopt, iring ug iro. So, we are happy for that,” segun pa ni Utlang.
Ang subsob nga kampanya pinaagi sa online sa pagsagop og gi –rescue nga iring ug iro maoy usa sa hinungdan sa pagsaka sa maong gidaghanon sa nasagop.
“Ubay-ubay na sad ang nakasabot nga ang asong pinoy, bisan tuod ang nawong dili kaayo kagwapohan, pero the love that they give sa mo-adopt, plus kuan sad siya, kanang sweet noh basta ayohon lang nimo og atiman,” segun pa ni Utlang.
Sa pagkakaron adunay mokabat sa 104 ka iro ang naa ubos sa pag-atiman sa DVMF apil na ang mga itoy nga ilang ipasagop.
“Please don’t shop but adopt. Give our asong pinoy a home. Ang proseso ra gyud is you come here in the office, you choose asa ana nga na-impound nga iro,” dugang pa ni Utlang. (BANAT NEWS)
- Latest
