288 flying voters gitangtang sa Comelec Mandaue
CEBU, Philippines — Gitangtang sa listahan sa Commission on Election (Comelec) sa Siyudad sa Mandaue ang 288 ka mga botante nga ilang nasuta nga makadaghan sila nagparehistro.
Si Assistant Election Office Jacquelin Reuyan ang mikumpirmar niini kinsa miingon nga nasakpan sila pinaagi sa Automated Fingerprint Identification System (AIS) nga makaadaghan na sila magparehistro.
Dugang pa ni Reuyan nga usa sa ilang gitangtang nga pangalan mao ang usa ka babaye nga nagparehistro sa Siyudad sa Mandaue ug narehistro usab sa Lungsod sa San Francisclo sa Isla sa Camotes.
Matud pa ni Reuyan nga nakabotar ang maong babaye sa 2022 presidential election apan nagparehistro na usab kini didto sa San Fancisco niadtong tuig 2023 sa pagpahigayon sa Sangguniang Kabataan ug Barangay Elections.
Una niini, si kanhi Subangdaku Barangay Kapitan Ernie Manatad miduso og iyang petisyon ngadto sa korte nga ipatangtang sa listahan sa registered voters ang gibanabanang 600 ka mga botante nga ilang gidudahang mga flying voters.
Kini human nga ilang nasuta sa personal nga pagsusi ang mga address nga gibutang sa mga kadudahang nagparehistro ug nasuta nga walay nakaila kanila didto ug wala sad sila sa tinuod nagpuyo sa maong address.
Gibasol ni Manatad ang mga barangay kapitan sa mga barangay diin nakalusot kining maong mga flying voters nga gituohang mamotar sa umaabot nga 2025 May elections. (BANAT NEWS)
- Latest
