MCWD nipadangat og position paper pag-amendar sa ordinansa

CEBU, Philippines — Ang Metropolitan Cebu Water District (MCWD) niluwat og position paper sa ordinansa sa paghatag og septage management program nga kinahanglang konsiderahon ang mga gagmay’ng mag-uuma.

Ang general manager sa MCWD Edgar Donoso atol sa ulahing regular session nipadangat sa ilang posisyon sa ordinansa nga nag-ulohan og “Amending Sections 3, 6, 15, 19, 26, and 27, to City Ordinance No. 2398,” o ang “Ordinance Providing for a Septage Management Program for the City of Cebu”.

Ang maong ordinansa gipangamahanan kini ni Konsehal Joel Garganera, chairman sa committee on Environment and Natural Resources.

Sa ilang suwat, gidayeg sa MCWD ang pag-amendar sa ordinansa nga ilang nakita nga nagtutok sa pagdumala sa mga hugaw gikan sa piggery ug poultry farms ug gi-acknowledge niini ang presensiya sa livestock activities sa siyudad ilabi na diha sa kabukiran.

Gipadayag sa MCWD nga daghan niining mga umahan giingong walay hustong pagdumala sa hugaw nga tubig ug ang uban naglabay og basura ngadto sa duol nga mga suba o ubang mga tubigan nga nahimong dakong hulga sa kinaiyahan.

Base sa giduso nga amendasyon sa ordinansa ang MCWD nagkanayon nga ang paglakip sa mga bayronon ug mga silot sa dili pagtuman niini makatabang sa pagpalambo sa mga pamaagi sa pagpanguma ug pagprotekta sa mga tinubdan sa tubig.

 “To ensure successful implementation, the city should explore ways to offer support and resources to these farmers”, tipik sa suwat sa MCWD.

Ug samtang positibo nga kalamboan ang pag-amendar sa ordinansa, ang kalamposan niini magdepende sa tabang nga mahatag sa kagamhanan sa siyudad.

Girekomenda usab nila nga adunay klaro nga mga probisyon sa pagpatuman sa mga lagda ug regulasyon sa ordinansa pinaagi sa paghatag sa lokal nga kagamhanan og tabang sa pagpatuman niini.

Sa samang suwat, ang MCWD dugang nilatid sa ilang mga rekomendasyon sama sa pagdugang og specific requirements sa septic tank design alang sa piggery ug poultry farms.

Ilaha usab nga girekomenda nga klarohon ang mga probisyon nga nagdili sa paghimo og mga septic tank sulod sa 25 meters radius gikan sa pinakaduol nga tinubdan sa groundwater. (BANAT NEWS)