PWD nga gidagit, gi-salvage diay
CEBU, Philippines — Nakit-an na daplin sa karsada sa Sitio San Miguel, Barangay Taptap, siyudad sa Sugbo ang na-missing nga person with disability (PWD) nga taga barangay Mambaling, apan patay na kini kagahapon sa buntag, Sabado, Pebrero 8, 2025.
Walay nakaila sa patay’ng lawas nianang sayo pa apan gihulagway kini nga gibana-banang nagpangidaron og 40-anyos, large body build, fair complexion, nagsul-ob og itom nga short pants, puwa nga tsinelas ug ang nawong natabunan gamay sa blue nga t-shirt samtang nagbuy-od sa karsada.
Duna kini usa ka samad-pinusilan sa ulo nga posibleng maoy hinungdan sa kamatayon niini. Paglabay sa pila ka oras, dunay pamilya gikan sa Mambaling nga nipatim-aw ug nagpakisayod sa maong insidente kay naa sila'y kabanay nga na-missing.
Ang ilang kabanay matud pa gidagit og wala mailhing mga tawo didto sa Barangay Mambaling, tuod man sa pagkakita nila sa patay’ng lawas mao kini ang ilang kabanay.
Si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nagkanayon nga dunay nakadungog og sipang buto diha sa lugar diin kini napalgan.
Nag backtracking karon ang kapolisan sa mga kabalayan ug mga establisamento padung sa lugar diin napalgan ang lawas kun aduna bay CCTV nga nakuha og footage sa mga nanglabay nga mga sakyanan o motor.
Palawman sa kapulisan kun unsa gyud ang nahitabo sa biktima u gang motibo sa pagpatay kaniya. (BANAT NEWS)
- Latest
