VE: Mga balay nga way kuryente libreng pasug-an sa DOE
CEBU, Philippines — Gisusi karon sa mga kadagkuan sa Visayan Electric kadtong mga panimalay nga wala gayuy suga sa ilang panimalay aron sila matauran niini nga libre.
Kini ang gibutyag ni Engr. Raul Lucero, Visayan Electric President and Chief Operating Officer.
Matud pa ni Lucero, aduna silay proyekto karon nga on-going verification pinaagi sa pagpangita sa mga balay diha sa mga sitio nga wala pay kuryente aron matauran sila og wire ug suga nga libre.
Sumala pa ni Lucero, tanan mga barangay ang na energized na lakip ang mga sitio pero aduna pay pipila nga walay kuryente tungod kay wala silay kwarta.
Ang maong proyekto libre kini apan iyang klarohon nga ang maong kwarta dili gikan sa VECO kung dili gikan sa Department of Energy ug gipaagi lang sa ilang buhatan aron sila ang moimplementar, dugang pa ni Lucero.
Gipadayag ni Lucero, ilaha kining gipangita karon tungod kay nakasumiter sila og listahan sa DOE niadtong 2023 sa panginahanglan nila pagbutang sa wirings ubos sa ilang franchise area.
Nahatagan sila og budget maoy rason sa pag validate kung anaa pa ba kini sila karon. Human ma validate, pasug-an gilayon sila sumala pa ni Lucero.
Gibutyag niya nga nagkadaghan ang wala pay mga suga pero ilaha gihapon silang tabangan. (BANAT NEWS)
- Latest
