Community College building tukoron sa Madridejos
CEBU, Philippines — Usa ka Community College building ang itukod sa lungsod sa Madridejos sa isla sa Bantayan, ug gipangulohan ni Gobernador Gwendolyn Garcia ang groundbreaking niini atol sa pagbisita sa gobernador niadtong niaging adlaw.
Ang maong building, tulo ka andana ug adunay unom ka mga classrooms o lawak.
Moabot sa P13.1 milyones ang kantidad o pondo alang sa katukoran sa maong edipisyo sa tunghaan diin itukod kini sa 313.74 metro kwadrado ang area sa barangay Bunakan sa lungsod sa Madridejos.
Sumala sa Kapitolyo, gipaabot nga matapos ang maong building sulod sa 240 ka adlaw.
Atol sa programa didto sa maong tunghaan, si gobernador Gwendolyn Garcia miawhag sa mga tinun-an nga motapos sa pageskwela sanglit mao kini ang pamaagi aron makatabang sa ginikanan.
“Kinahanglan molampos gyud mo, kay kamo usab, kay kamo man ang paglaom sa inyong guinikanan, sa inyong pamilya” matud ni Garcia.
Ang pagtukod sa maong Community College Building gipaabot nga makapalambo pa sa educational infrastructure sa lungsod sa Madridejos diin ang tinguha mao ang paghatag og hamugaway nga espasyo alang sa pagtuon sa mga estudyante.
Kuyog ni Garcia sa maong kalihokan mao sila si Madridejos Mayor Romeo Villaceran, Vice Mayor Vincent Villacrusis, Ako Bisaya Second Nominee Ms. Carissa Garcia, Board Member Glen Soco, ug Bureau of Customs Port of Cebu District Collector Atty. Geoffrey De Vera IV. (BANAT NEWS)
- Latest
