Lalaki, tomboy gipamusil usa patay

CEBU, Philippines — Usa ang patay samtang usa ang angol sa nahitabong pagpamusil sa Sitio Baskio, Barangay Basak Pardo, sa siyudad sa Sugbo kagahapon sa kaadlawon, Biyernes, Pebrero 7, 2025.

Ang nakalas mao si Christopher Llaban alyas Tope ug ang naangol mao ang tomboy nga si Jenny Gemang, nga parehong nagpuyo sa Barangay Quiot ning siyudad.

Base sa imbestigasyon sa Inayawan Police Station 7 Cebu City Police Office(CCPO) ang duha ka mga biktima nisulod og balay sa Sitio Baskio apan giingong kalit lang sila gipamusil.  Nakaangkon og samad-pinusilan sa kalawasan si Llaban nga maoy hinungdan sa hinanali niyang kamatayon, samtang si Gemang nakadagan ug nitago og laing balay apan gigukod gihapon sa wala mailhing mamumuno ug gipusil.

Naabtan sa opisyales sa Barangay Basak Pardo si Gemang sa ikaduhang andana sa balay nga gisudlan niini ug nakaangkon kini og samad pinusilan sa ulo ug lawas ug gidala dayon sa tambalanan.

Na-recover sa crime scene ang lima ka basiyo sa bala.

Nasayran nga gipatawag na sa barangay ang duha ka biktima nga gikatahong notadong mga drug personality sa Barangay Quiot aron dili sila pasudlon sa Barangay Basak Pardo.

Nadakpan na kaniadto ang duha sa lain-lain nga kaso apan dihang nakagawas padayon gihapon sa ilang illegal nga kalihukan.

Padayun pa ang kapolisan pagtumbok kun kinsa kadtong lalaking namusil kanila sa sud sa balay nga ilang gisudlan.  IBM BANAT NEWS