Residente sa Labogon padayon ang problema sa batching plant

CEBU, Philippines — Nanghinaot ang mga residente sa Barangay Labogon, Dakbayan sa Mandaue nga ang bag-ong administrasyon karon sa siyudad mopagawas og cease and desist order aron mahunong na ang operasyon sa cement batching plant sa ilang lugar nga dugay na nilang gireklamo tungod kay nakaapekto kini sa ilahang panglawas.

Sayo pa, dihang nasayod ang 1,000 ka residente sa Barangay Labogon nga adunay tukuron nga batching plant sa ilang dapit nipirma sila og petisyon nga supak sa katukoran sa maong batching plant niadtong Marso 19, 2019.  Nakalatid sa ilang petisyon ang rason sa ilang pagsupak nga mao ang grabeng abog, kemikal nga gamiton, kasaba sa dagkong truck ug makina ug ang pag-agi nila.

Gihulagway sa mga residente nga gumikan niini daghan na ang nasakit nila tungod kay apektado na sila sa operasyon sa maong planta diin ang uban gisip-on, gihubak ug giatake kay dili katulog.

Matud ni Ines Necesario, usa sa mga apektadong residente nga nidangop sila ni dismissed mayor Jonas Cortes sa ilang yango-ngo apan giingong wala sila tagda.

Ug pila ka higayon sila nga nagbalik-balik sa Mandaue City Hall sa panghinaot nga madungog ang ilang hangyo apan giingong gipasaligan ra sila ug wala atimana.

Nasayran nga ang mga residente nidangop na usab sa Department of Interior and Local Government aron tabangan sila sa ilang hangyo ngadto sa kagamhanan sa siyudad.

Gawas niini, niduol usab sila sa Business Permit and Licensing Office ug nangutana unsay sitwasyon sa kompaniya nga nagtukod og batching plant ug didto ilang nasuta nga wala kini mahatagi og business permit sukad niadtong tuig sa 2021 hangtud sa 2022 gumikan kay wala nakatuman sa rekisitos.

Apan bisan sa ilang paningkamot giingong wala gihapon sila tagda ug tabangi sa kanhi mayor hinungdan nga napugos ang mga residente sa pag-file og kaso batok kang Cortes ngadto sa Ombudsman niadtong Oktubre, 2022.

Ang Ombudsman ipagawas og desisyon sa maong reklamo niadtongSeptiyembre 2024 nga naglatid nga si Cortes guilty sa grave misconduct tungod kay nitugot nga ipadayon ang operasyon cement batching plant bisan og walay og permits lakip niini ang environmental permit.

Karon nga bag-o na ang mayor sa Dakbayan sa Mandaue mohangyo usab sila nga mopagawas kini og cease and desist order subay sa kamandoan sa Ombudsman.

Giklaro sa mga apektadong residente nga walay nagpaluyo nila nga politiko ug kaugalingon nila kining desisyon tungod kay gusto nila baroganan ang ilang katungod isip botante sa Dakbayan sa Mandaue. BDB BANAT NEWS