Senior citizen sa Mandaue gihatagan og ayuda

CEBU, Philippines — Gisugdan na sa kagamhanan sa Dakbayan sa Mandaue ang pag-apod-apod sa pinansiyal nga ayuda alang sa mga senior citizen sa siyudad.

Ang maong kalihokan gipahigayon diha sa Mandaue Cultural and Sports Complex sa Sitio Tribunal sa Barangay Centro sa nahisgutang siyudad.

Si Konsehal Jimmy Lumapas, chairman sa committee on social services sa konseho sa siyudad nagkanayon nga sa naandan ang mga senior citizen kuhaon og sakyanan gikan sa ilang barangay ug ihatud usab pagbalik ngadto sa barangay nga ilang gipuy-an

Matud ni Lumapas nga makapahimulos gihapon ang mga senior citizen sa libreng serbisyo sa kagamhanan sama sa libreng medical ug dental checkup, libreng tambal, vitamins, libreng tupi ug uban pa. Hatagan usab ang mga senior citizen og libreng snacks ug libreng tubig nga mainom samtang magpaabot sila sa ilang pagdawat sa ilang pinansiyal nga ayuda

Matud usab ni Lumipas nga himuon gihapon nila ang paghatud sa pinansiyal nga ayuda sa matag senior citizen nga dili na makalakaw tungod sa gihambin niining balatian sa  panglawas. Dugang ni Lumapas nga himuon ang pag-apod-apod sa pinansiyal nga ayuda sa mga senior citizen gikan sa 27 ka barangay sa siyudad sulod niining bulan sa Pebrero sa paglikay sa election ban nga ipatuman sa Comelec. BDB  BANAT NEWS