SGLG kausa nalang i-award sa DILG

CEBU, Philippines — Dili na kinahanglan pa magdalidali og sumiter ang mga local government units (LGU) sa mga rekisitos alang sa Seal of Good Local Governance (SGLG) program matag tuig tungod sa gihimong kausaban sa sistema sa Department of Interior and Local Government (DILG).

Atol sa iyang tigom uban ni Gobernador Gwendolyn Garcia ug mga mayor sa Sugbo niadtong Pebrero 5, si Interior Secretary Juanito Victor “Jonvic” Remulla nagkanayon nga ilang gihimong term-based ang pagsumiter sa mga rekisitos alang sa DILG.

Pasabot niini nga dili na kada tuig kondili kausa ra sa termino sa naglingkod nga mayor ang paghatag og SGLG Award.

“Six months ka maghahanda, six months isa-submit mo, ang DILG in six month ang ginagawa mag-aasess, ang kapal ( ng mga papel na i-assess), anong nangyayari?  Compliance lang. So ngayon magiging once in every three years na, ang awarding,” matud ni Remulla.

Ang SGLG usa ka institutionalized award, incentive ug recognition-based o pag-ila nga programa sa DILG ngadto sa mga LGUs aron mapapalmbo ang maayong panggobyerno taliwala sa hagit sa local government landscape.

Ubos sa maong programa, ang mga LGUs kinahanglan makapasar sa 10 ka kategorya sa panggobyerno aron makadawat og pasidungog o pag-ila, apil na niini ang financial administration and sustainability, disaster preparedness, social protection and sensitivity; health compliance and responsiveness; sustainable education, business-friendliness, tourism, heritage development, culture, and arts; ug youth development.

Sa Remulla nagkanayon nga sa giusab nga SGLG, gikan sa 10 ka kategorya, tulo na lang ang kinahanglan i-comply sa mga LGUs, kini ang fiscal management, disaster resiliency ug innovation.

“Lets make it simple, and three years, I think this term-based SGLG makes more sense kasi totality ng trabaho nyo yan eh, yan ang ginawa ninyo, at yan ang report card ninyo sa tao, so patunay na may ginawa akong (kayong) tama,” matud ni Remulla. (BANAT NEWS)