Amerikano nangulata’g duha ka babaye

CEBU, Philippines — Gibalhog sa prisuhan ang usa ka Amerikano human giingong iyang  gikulata ang iyahang kaipon apil na sa laing babayeng igo ra niuwang diha sa Sitio Maharlika, Barangay Sambag 2, siyudad sa Sugbo, Miyekules sa gabii, Pebrero 5, 2025.

Ang maong langyaw mao si alyas Tite, 41, nagpuyo sa Barangay Pit-os, dakbayan sa Sugbo. Samtang ang iyang kaipon 28 anyos  ug ang  49 anyos nga babayeng niuwang kaniya nga taga Sitio Maharlika, Barangay Sambag 2.

Sa impormasyon sa Abellana Police Station 2 Cebu City Police Office(CCPO) nga ang suspetsado gidakop human ang mga reklamante nagpakitabang sa dihang ang langyaw niadto sa maong lugar kay nangita sa iyahang kaipon nga gipasanginlan niyang nangawat og groceries nga nagkantidad og P10,000.

Apan ang kapuyo nagdumili sa pagkuyog sa langyaw gumikan sa kahadlok nga dapatan na sab kini.  Apan matud pa gibunlot sa suspek ang kaipon pinaagi sa pagbitad sa buhok niini padulong sa dalan nga niresulta nga nagarasan ang bukton ug paa niini.

Gisumbag sab matod pa sa suspek ang ulo sa iyahang kaipon.

Ang 49-anyos nga ginang nga nakakita sa hitabo nisuway kini og uwang apan apil siya sa gisumbag sa apapangig ug miingon nga "You Bitch!" hinungdan nga natumba kini ug nasamad sa tuhod ug pagkahuman gisiko hinungdan nga nakuyapan kini.

Sa dihang gidala sa police station ang langyaw  giingong nasuko kini ug gigisi ang incident report nga gisuwatan sa mga reklamante.

Nag-wild sab kini ug gisyagit-syagitan ang mga polis ug nagdumili magpa aresto hinungdan nga dunay komosyon nga nahitabo.

Kasong kalapasan sa Republic Act 9262, Slight Physical Injury ug Article 151 sa Revised Penal Code ang kasong ipasaka batok sa suspetsado. (BANAT NEWS)