Garcia dili pabor nga gastohan na usab ang BRT study

CEBU, Philippines — Dili uyon si gobernador Gwendolyn Garcia nga mangutang o mogasto na sab ang gobyerno alang sa laing feasibility study nga himoon sa Cebu Bus Rapid Transit (CBRT).

Atol sa gihimong regional development council (RDC) meeting sa Central Visayas niadtong Enero 30 karong tuiga diin mitambong si Presidente Ferdinand “Bongbong” Marcos Jr., si gobernador Gwendolyn Garcia mipahibalo kang Marcos nga ang feasibility study o pagtoon sa CBRT karaan na kaayo sanglit nahimo kini niadtong 2015 ug dili na kini mo “reflect” sa kasamtangang sitwasyon sa dakbayan sa Sugbo partikular na sa dagan sa trapiko ug gidaghanon sa mga sakyanan.

“I said, Mr. President, really I speak out because you were the one who broke ground on this project that was conceived several administrations years ago, and I wonder if this would really solve our traffic problems or aggravate them” matud ni Garcia.

Kini ang hinungdan nga ang presidente nimando nga makig-alayon ang Department of Transportation (DOTr) sa local government units (LGU) sa Sugbo sama sa dakbayan sa Sugbo ug Probinsya sa Sugbo pag-abot sa mga plano pa sa maong proyekto.

Unang gipadayag ni Cebu City Mayor Raymond Alvin Garcia nga adunay pag-update sa feasibility study sa CBRT aron mohaom sa kasamtangang sitwasyon karon sa dakbayan sanglit ang unang feasibility study sa maong proyekto naaprobahan niadtong pang tuig 2015.

Apan si gobernador Garcia wala misalikway nga posibleng mangutang na sad alang sa pag-update sa feasibility study.

“So can we just step back and discuss it? another feasibility study, utang na sad na ha, that would be conducted again” matud ni Garcia.

Laing sugyot ni Garcia mao ang pagpahimulos sa eksperto sa gobyerno ug makig-alayon sa pribadong sektor sama sa gihimo karon sa Kapitolyo alang sa Metro Cebu Expressway nga nakig-alayon kini sa Spanish firm nga Acciona.

Sa pagkakaron, padayon ang konstruksyon sa CBRT ug gani hapit na mahuman ang Phase 1 niini. (BANAT NEWS)