Garcia nipasidaan batok sa peke nga FB account

CEBU, Philippines — Nipahimangno si Cebu City mayor Raymond Alvin Garcia sa katawhan nga dili magpailad sa usa ka fake nga facebook pages nga naggamit sa iyang pangalan.

Ang mayor pinaagi sa iyang social media pages nipahibalo ug niklaro nga wala siya magpadala ug mensahe ngadto sa mga tawo nga nakadaug sila og P10mil nga kwarta.

Si Garcia miingon nga walay kamatuoran ang maong Facebook page ug wala usab siya magpadala og mensahe may kalabutan sa maong cash awards.

Gipahimangnuan sa mayor ang katawhan nga magmabinantayon ug magmatngon ug itaho gilayon ngadto sa mga otoridad ang mga accounts nga nalambigit sa pagpangilad.

Ang mayor nidasig sa katawhan nga sa dili pa motubag sa mga mensahe susihon una ang kamatuoran niini aron maprotihian ang kaugalingon lakip usab ang uban. (BANAT NEWS)