Pipila ka kawani sa Cebu City Hall posibleng mataktak sa trabaho

CEBU, Philippines — Posibleng matangtang sa trabaho ang pipila ka mga empleyado sa kagamhanan sa Siyudad sa Sugbo human kini masakpi nga maoy mopanso sa daily time records (DTR) sa ilang kauban nga wala motunga sa trabaho.

Si Ariel Yburan, pangulo sa Civil Security Unit (CSU) nagkanayon nga base sa ilang insiyal nga imbestigasyon  upat ka personnel ang ilang nasakpan nga nipanso og tag-duha ka DTR matag usa aron ma-log ang oras sa ilang trabaho ug sa ilang absent nga kauban.

"Ato na nang giaksiyonan. Nagpada nata og incident report sa city admin, sa HR ug office of the mayor for them to take action. Kay og ato gud ni sila pasagdan ingon-ani mosiaw ni sila", ni Yburan pa.

Gibutyag ni Yburan nga walo ka job order nga kawani ang ilang kasamtangang gipaubos sa imbestigasyon ug ipaubos usab sa hearing sa HR department ang nasakpan nga nagpanso ug nagpapanso sa ilang DTR.

Kadtong mapamatud-an nga nakahimo og kalapasan ipatangtang kini sa pwesto tungod sa pagkadili matinud-anon ug silotan usab ang nagpapanso.

Matud ni Yburan nga dili kini makatarongan alang sa uban nga nitunga sa trabaho ug nibuhat sa ilang mga katungdanan.

"More than 8-hours among trabaho nya sila yahay kaayo. Nya unsa may kalabutan nato kong wala diay ni nitambong", ni Yburan pa.  Si Yburan nagkanayon nga posibleng mas daghan pa ang nibuhat niini gikan sa ubang departmento ilabi na sa mga dapit nga walay nagbantay lakip ang City Health Office ug Fort San Pedro hinungdna nga ilahang gipaningkamutan karon nga mas hugtan pa ang ilang pag-monitor.

Apan bisan pa sa pagkamabinantayon sa CSU nagpabiling hagit ang pag-monitor tungod kay limitado ang ilang kawani diin ang ilang buhatan aduna lang kini 21 ka personnel nga gibahin sa tulo ka shift hinungdan nga dili masakpan ang ubang nagbinuang. (BANAT NEWS)