Konseho nipasalig nga taga Cebu City ang vendors sa night market
CEBU, Philippines — Ang Cebu City Council nipasalig nga ang mga vendor nga gihatagan og slots sa night market rehistrado nga mga botante sa siyudad kini nunot sa mga reklamo nga giingong adunay mga outsider ang gi-accommodate.
Opisyal nga gibuksan ngadto sa publiko ang Colon Night Market niadtong Disyembre 14, 2024.
Apan dihang gituki sa konseho ang hangyo niini alang sa pagpasira sa mga karsada atol sa regular session niadtong Miyerkules gipadayag ni Konsehal Nestor Archival, Sr. ang pipila ka mga kabalaka.
Matud ni Archival nga ubay-ubay nga mga vendor ang dili taga Dakbayan sa Sugbo ug nangayo usab siya og katin-awan sa presyo sa mga vendor nga nagbayad sa abang, nga wala pa matino sa proponent nga si Konsehal Renato Osmeña.
Sa iyang bahin, si Osmeña nga ang kapasidad sa giaprobahan nga lugar maka-accommodate og 500 ngadto sa 700 ka vendors.
Gipadayag ni Osmeña nga hatagan og prayoridad ang mga slot niadtong unang ni-apply. Si Archival nibutyag nga nakadawat siya og daghang mga reklamo nga adunay mga vendor nga gikan sa Mactan sa Dakbayan sa Lapu-Lapu.
Giangkon ni Osmeña nga nasayod sila niini hinungdan nga niimplementar sila og mas istrikto nga prerequisite nga kinahanglang rehistrado nga botante ang usa ka vendor.
Human gipalabang ang resolusyon, si Archival niduso og corollary motion nga naghangyo sa opisyales sa Garbe Asense Sumbanan Alyansa (GASA), vendor association nga nagdumala sa night market sa paghatag sa gidaghanon sa mga vendors nga ma-accommodate uban sa listahan sa mga vendor ug sa ilang bayaran nga abang.
Ug matud ni Osmeña nga ang maong report mahimong makuha sulod sa semana.
Ang giaprobahan nga pagsira sa karsada aron ma-accommodate ang night market naglakip sa mga bahin sa Colon St., Jakosalem St., ug Junquera St., sugod niadtong Disyembre 14, 2024, hangtud sa Pebrero 15, 2025, gikan sa alas 6:00 sa gabii hangtud sa alas 2:00 sa kadlawon pagkasunod adlaw. (BANAT NEWS)
- Latest