Mga barko nga nag angkorahi gipabayad na

CEBU, Philippines — Nagbayad na ang mga barko nga nag angkorahi sa kadagatan sa Dakbayan sa Talisay.

Kini maoy gitug-an ni konsehal Alito Bacaltos, chairman sa committee on environment sa dakbayan.

Matud pa niya nga taod-taod na ang mga barko nga mag angkorahi sa kadagatan sa Talisay hinungdan nga nakita nila ang epekto niini sama sa mga hugaw gikan sa barko nga niresulta sa pagmenos sa kuhang isda sa mga mananagat.

Gibana-bana nga moabot sa 10 ngadto sa 20 ka barko ang mag angkorahi matag adlaw.

Si Bacaltos niingon nga pinaagi sa ordinansa nga ilang napasar ilang gipangayoan og Environmental Disturbance Fee ang mga barko.

Ang ilang kwentada mao ang 0.65 centavos matag tonage matag adlaw.

Ang lokal nga barko motimbang lang og 800 ngadto sa 4mil ka tonelada apan ang international nga barko motimbang sab og 20mil ngadto sa 30mil ka tonelada.

Sigon pa ni Bacaltos nga ang 20 porsyento nga koleksyon adto ihatag sa pito ka coastal barangay sa Talisay aron ilang itabang sa mga mananagat o unsa man ang ilang himuon sa kadagatan aron kini abunda gihapon sa isda.

Nahibaw-an nga diha sa Talisay mo angkorahi ang mga barko tungod kay adunay higayon nga puno ang pantalanan sa siyudad sa Sugbo. (BANAT NEWS)