Makolekta nga basura sa Talisay gipaabot nga modaghan
CEBU, Philippines — Gipanglantawan nga modaghan ang makolekta nga basura karong buwana.
Kini gumikan sa daghan nga kalihukan nga may kalabotan sa nagsingabot nga kapaskohan.
Si Edwin Nierves, kinsa nagdumala sa Material Recovery Facility sa Talisay nibutyag nga gitrabaho nila ang paglain sa mga basura nga malata, dili malata ug basura nga mapuslan pa.
Nagkanayon si Nierves nga sa ordinaryo nga adlaw makakolekta sila og 3 mil ka toneladang basura matag adlaw.
Apan karon nga daghan ang party ug kalihukan posible nga moabot ang koleksyon sa basura sa 9 mil ngadto sa 11 mil ka tonelada matag adlaw.
Si konsehal Alito Bacaltos, chairman sa committee on environment nibutyag nga kasagaran sa basura, mga plastic nga mao sab ang hinungdan sa pagbara sa mga kanal nga moresulta sa baha.
Subay niini siya nanawagan sa katawhan nga unta responsable sila sa paglabay sa basura kay kana lang nga aksyon dako na og tabang alang sa kalikupan. (BANAT NEWS)
- Latest
