Alice Guo patambungon sa Senate hearing

CEBU, Philippines — Gikatakdang motungha ang gitaktak nga Bamban mayor nga si Guo Hua Ping o alyas Alice Guo karong adlawa, Septiyembre 9, alang sa pagpadayon sa Senate Committee on Women, Children, Family Relations and Gender Equality hearing sa Senado.

Si Guo bag-ohay lang nabalik sa Pilipinas human kini nadakpan didto sa Indonesia pipila ka semana human kini miikyas gawas sa nasud kauban ang iyang igsuong si Shiela Guo ug kasosyong si Cassandra Ong.

Unang nadakpan silang Shiela ug Cassandra ug uwahing nasikop didto ang gitaktak nga mayor.

Tungod sa matud pa hulga sa kinabuhi, pasuoton og bulletproof vest ug posas si Guo sumala pa sa tigpamaba sa PNP nga si Police Colonel Jean Fajardo.

Ang Senado unta ang dunay katungod pagkustodiya ni Guo sanglit sila maoy nipagawas og warrant human kini miikyas, apan usa ka korte sa Tarlac ang nipagawas sab og warrant of arrest batok kaniya, apan nagdumili siya pagbutang og piyansa niini, hinungdan nga napunta sa PNP ang pagdetinir kaniya.

Giklaro sa PNP nga walay special treatment nga madawat si Guo samtang siya gikustodiya.