Fire volunteers giawhag nga mo-promote sa BIDA program
CEBU, Philippines — Giawhag ni Department of Interior and Local Government (DILG) Secretary Benjamin "Benhur" Abalos, Jr. ang kapin sa 300 ka libo ka mga lokal nga fire volunteers sa tibuok nasud nga mahimong ambassador sa Buhay Ingatan, Droga'y Ayawan (BIDA).
Ang BIDA usa ka flagship program sa DILG aron maminusan ang panginahanglan sa ilegal nga drugas pinaagi sa pagpasiugda sa kahimsog ug pag-awhag sa rehabilitasyon sa drugas.
Gihimo kini nga panawagan sa sekretarya human ang DILG ug ang Bureau of Fire Protection (BFP) opisyal nga gilusad ang BIDA Ka Sa Fire Square Roadshow.
Matud ni Secretary Abalos nga sa kalapad sa organisasyon sa BFP nga adunay mga volunteer firefighters, magtukod sila og mga BIDA Volunteer Firefighters sa matag barangay sa tibuok Pilipinas, ug magsilbi silang ‘patay sunog, patay droga; sa bawat lugar, BIDA ka!”.
Nipadayag usab siya sa iyang pasalamat ngadto sa mga bombero ug mga volunteers ug gidayeg ang ilang kaisog nga susama sa usa ka tinuod nga bayani kay ilang girisgo ang ilang kinabuhi aron maluwas ang mga tawo ug mga kabtangan.
Sa laing bahin, ang BIDA Ka sa Fire Square Roadshow gitambungan sa kapin sa 5,000 ka mga partisipante nga naglakip sa mga local chief executives, local disaster risk reduction and management officers, Barangay DRRM Council members, Sangguniang Kabataan officials, ug barangay tanods.
Gibida sa BIDA Ka sa Fire Square Roadshow ang kultura sa kaluwasan sa komunidad, seguridad, ug panglawas diin gi-display ang mga ekipo sa emerhensiya ug rescue, ug nihatag og higayon sa mga nitambong sa pagsulay sa mga aktibidad sama sa rappelling ug paggamit sa fire extinguishers. —MEL BANAT NEWS
- Latest
