Kapin dos mil nisalmot sa “Takbo para sa West Philippine Sea”

CEBU, Philippines — Kapin sa 2,000 ka mga partisipante ang miapil sa advocacy run sa Cebu nga "Takbo para sa West Philippine Sea" aron palig-onon ang pakigbatok sa pag-angkon sa China sa West Philippine Sea, kagahapon, Domingo, Agosto 11.

Nangulo sa kalihukan mao ang National Task Force para sa West Philippine Sea kauban ang Philippine Coast Guard (PCG), Presidential Communication Office (PCO), ug Runrio Inc., nga gipahigayon sa SM Seaside Cebu.

Matud ni Commodore Jay Tarriela, spokesperson sa PCG sa West Philippine Sea, nga gihimo kini nga nagdala sa tema nga “Sa West Philippine Sea, Ang Yaman Nito, Ay Para Sa Mga Filipino,” aron mapahibalo ang katawhan sa paningkamot sa nasudnong gobyerno sa pagbarug ug pakigbisog sa West Philippine Sea.

“Ako po ay taos pusong nagpapasalamat sa ating mga kababayan dito sa Cebu. This just goes to show na ang atin pong laban sa West Philippine Sea ay tinitindigan natin lahat mula Luzon hanggang Visayas,” dugang pa ni Tarriela.

Nisalmot usab sa advocacy run si Philippine Information Agency (PIA) Director-General Usec. Jose Torres, Jr., nga nagpasalamat ug naglaum nga magpadayon ang suporta sa mga Cebuano sa kampanya batok sa mga hagit sa pag-angkon sa mga bahandi sa nasud.

Samtang wala makatambong si acting Cebu City mayor Raymond Alvin Garcia ug nagpadala nalang kini og mensahe pinaagi sa iyang Executive Assistant ug Program Director sa Cebu City Bantay Dagat Commission, Ed Karlon Rama.

“The Cebu City Government is in oneness with the President’s concern for the country’s sovereignty and the need to raise awareness about the Philippine’s territorial rights and protection of our maritime interest,” suma ni Garcia.

Magpasalamaton usab si Garcia sa tanan nga nagpaluyo niining inisyatiba alang sa ilang paningkamot bahin sa mga mahinungdanong isyu pinaagi sa mapadayunong pamaagi, sama ani nga advocacy fun-run.

Ang unang yugto sa “Takbo Para sa West Philippine Sea” gipahigayon sa Pasay City niadtong Hulyo 7, nga nakadani og 7,000 ka partisipante. Samtang ang ikatulong yugto sa kalihokan ipahigayon sa Cagayan de Oro sa Setyembre 8, 2024.

Sa laing bahin gihugopan sa pagsalmot sa mga kawani ug molopyo sa kabarangayan sa siyudad sa Mandaue ang gipasiugdahan nga Fun Run sa kagamhanan sa siyudad sa Mandaue.

Kini maoy tipik sa mga kalihokan sa kasaulogan sa ika-55 nga Charter Day sa Mandaue City.

Lakip sa nisalmot ang mga City Hall employees ug mga empleyado sa mga nasudnong kagamhanan.

Gawas sa Mandaue 55th Charter Day Fun Run dungan usab niini ang gipahigayon nga zumba ingon man raffle draw alang sa mga runners. — /MEL (BANAT NEWS)