Kapin sa 600 ka depektosong timbangan gikatakdang gub-on

CEBU, Philippines — Kapin sa 600 ka depektosong mga timbangan nga nasakmit gikan sa kamerkadohan sa Dakbayan sa Sugbo sulod sa tulo ka tuig ang gikatakdang panggub-on sa kagamhanan sa siyudad.

Ang Office of the City Markets nipahibalo nga karon umaabot nga August 19, 2024 ipahigayon ang pagpangguba sa mga timbangan human sa flag raising ceremony.

Atol sa pagpangguba sa mga depektoso nga timbangan saksihan kini ni Acting Cebu City Mayor Raymond Alvin Garcia, opisyales sa OCM ug Konsehal Renato “Junjun” Osmeña.

Ang tigpamaba sa OCM John Paul Amores nibutyag nga ang ilang buhatan nakasakmit og 639 ka timbangan gikan tuig 2022 hangtud sa Hulyo 2024.

Niabot sa 297 ka depektosong timbangan ang ilang nasakmit sa tuig 2022; samtang  230 sa tuig 2023 ug 112 hangtud H0ulyo 2024 diin kasagaran niini nakuha gikan sa mga ambulant vendor.

Ang maong mga timbangan gub-on aron dili na subling magamit ug mawagtang ang pagduda sa mga konsumidor nga posibleng i-recycle kini.

Ang nasakmit nga mga timbangan gibutang sa duha ka dapit diha sa OCM Office sa Carbon Public Market ug sa warehouse nga nahimutang sa South Road Properties.

Gibutyag ni Amores nga adunay mga timbangan nga nasakmit nga gi-tampered ang spring hinungdan makita nila nga molapas sa timbangan sa ilang ibutang nga timbang.

Ang mga nasakpan nga malapason gipahamtang kini og multa. (BANAT NEWS)