P13M gigahin sa pag-ilis sa taytayan sa Sanciangko

CEBU, Philippines — Di mominos sa P13 milyones ang gigahin nga budget alang sa demolisyon ug pag-ilis sa 71-anyos nga taytayan sa Sanciangko duol sa Taboan Market sa dakbayan sa Sugbo.

Sa pakighinabi sa mga tigbalita kagahapon (Miyerkules), Agosto 7, 2024, si Konsehal Jerry Guardo, Chairman sa Committee on Infrastructure sa City Council miingon nga kini nga proyekto gipundohan sa Department of Public Works and Highway (DPWH).

Nahukman ang pagguba sa taytayan human masuta sa pag inspection nga dili na kasaligan ang integridad sa estruktura sa taytayan ug girekomendar sa DPWH ang kinatibuk-ang pag-ilis sa taytayan nga natukod niadto pang 1953.

Matud ni Guardo nga nasuta nga duna nay mga taya ang ilawom sa taytayan ug sa pipila ka bahin tungod sa epekto sa tubig sa sapa ug dili na gyud kini luwas.

"Ug nakakuha sila ug clearance gikan sa Cultural and Historical Affairs Commission (CHAC) kay naa man siya sa historical nga commission," suma pa ni Guardo. 

Sa dili pa mapatuman ang demolisyon, kinahanglang mokuha una og permit ang DPWH gikan sa Cebu City Transportation Office (CCTO) tungod usab sa ipatuman nga total road closure.

Magsugod ang civil works sulod ning buwana. Ang Phase 1 himoon sulod sa 199 ka adlaw samtang ang Phase 2 himoon sulod sa 251 ka adlaw.

Hinuon miingon si Guardo nga dili makasugod ang DPWH sa civil works kung wala ang tanang gikinahanglang clearance lakip na ang permit gikan sa Commission on Audit (COA). (BANAT NEWS)