Inflation wa ka epekto sa mga merkado sa siyudad sa Sugbo

CEBU, Philippines — Ang Cebu City Market wala pa maapektuhan sa 4.4% nga inflation sa tibuok nasud tungod kay aduna pay seguridad sa supply sa dakbayan.

Nunot sa 4.4% nga inflation rate nga mitugbaw sa nasud, si Robert Barquilla, Cebu City Market Administrator niingon nga ang epekto niini wala pa makaabot sa dakbayan sa Sugbo.

Sa pakighinabi sa mga tigbalita kagahapon (Miyerkules), si Barquilla niingon nga nabati na nila ang pagsaka sa inflation taliwala sa huwaw tungod sa El Nino phenomenon. Sukad niadto, ilang gipatuman ang pagmonitor sa presyo sa tanang merkado sa siyudad.

"Pero amo ng bantayan kay basin ang uban, magpahimulos ba. Ug naa tay masakpan ana nga mag overpriced, of course, ato gyud ng i penalize," matod ni Barquilla. Giklaro ni Barquilla nga makaapekto ang inflation kon mokunhod ang suplay.

Siya nidugang basta magpabiling consistent ang mga suplay, dili maapektuhan ang mga presyo. Bisan pa, ang pag hoard kun pagtago sa mga suplay makahimo sab og kalainan nga hingpit sab nga bantayan.

"So far wala man tay problema. Kay mura man gud nig center ang Cebu kay ana Bohol, Misamis, Cagayan, Dalaguete, Argao, Sibonga, naa diri gitungod ang mga supplies sa Cebu," matod ni Barquillas.

Gikataho nga ang Philippine Statistics Authority (PSA) mipahibalo nga ang Pilipinas adunay pagsaka sa inflation ngadto sa 4.4 porsyento niadtong Hulyo, nga milabaw sa target range sa gobyerno nga 2 ngadto sa 4 porsyento. (BANAT NEWS)