Pres. Marcos dili uyon nga isuspenso ang transport modernization

CEBU, Philippines — Gisalikway ni Presidente Ferdinand R. Marcos Jr., ang sugyot nga pagpahunong sa pagpatuman sa Public Transport Modernization Program (PTMP), kanhi Public Utility Vehicle Modernization Program (PUVMP).

Suma pa sa presidente nga dili siya uyon sa panawagan nga isuspenso ang PTMP alang sa laing pagrepaso kay ika pito na kini ka higayon nga gi-postpone.

“I disagree with them because sinasabi nila minadali. This has been postponed seven times. The modernization has been postponed for seven times,” matud pa ni president Marcos.

Gihatagan niya og gibug-aton nga sa 80 porsyento nga gikonsolida ug ang kadaghanan pabor, ang mga pagsupak gikan sa minoriya dili angay magdiktar sa pagpadayon sa programa.

Sa opisyal nga pamahayag sa Land Transportation Franchising and Regulatory Board (LTFRB), gipasalamatan ni LTFRB Chairperson Atty. Teofilo Guadiz III si Presidente Marcos sa iyang padayong pagsuporta sa PTMP, nunot sa panawagan nga suspensuhon ang pagpatuman niini.

Matud ni Guadiz nga ang makanunayong pasalig ni Marcos nagpalig-on sa kamahinungdanon sa modernisasyon sa sistema sa pampublikong transportasyon sa nasud. (BANAT NEWS)