DOLE nimando sa mga employer sa pagtuman sa holiday pay

CEBU, Philippines — Niisyu ang Department of Labor and Employment (DOLE) og pay rules alang sa duha ka holiday karong buwana niadtong Lunes, Agosto 5, 2024.  Base sa Labor Advisory No. 9, giawhag ni Secretary Bienvenido Laguesma ang mga employers sa tukmang pagbayad sa suholan alang sa Agosto 21 nga Ninoy Aquino Day, usa ka special non-working day ug National Heroes Day inig Agosto 26 nga regular holiday.

Alang sa Agosto 21, magsunod kini sa “no work, no pay” nga prinsipyo diin ang mga empleyado nga dili motrabaho dili mabayran, gawas kung ang polisiya sa kompaniya nagtugot sa pagbayad sa usa ka espesyal nga adlaw, sumala sa DOLE.

Atol sa espesyal nga holiday, ang usa ka empleyado makadawat og dugang nga 30 porsyento sa iyang basic wage sa unang walo ka oras nga pagtrabaho (basic wage x 130 porsyento), ug kung nagtrabaho lapas sa walo ka oras, dunay dugang nga 30 porsyento sa hourly rate.

Kung ang empleyado nagtrabaho atol sa espesyal nga adlaw nga mao usab ang ilang adlaw sa pagpahulay, makadawat sila og dugang nga 50% sa ilang basic wage sa unang walo ka oras ug dugang nga 30% sa matag oras nga rate alang sa overtime.

Sa Agosto 26, ang mga empleyado makadawat og 200 porsyento sa ilang basic wage sa unang walo ka oras ug dugang nga 30 porsyento sa basic wage sa 200 posyento alang sa overtime. (BANAT NEWS)