DSWD nakadawat og donasyon gikan sa Bingo Plus Foundation Inc.

CEBU, Philippines — Nidonar ang Bingo Plus Foundation, Inc. og mga ekipo nga nagkantidad og P1.5 milyones ngadto sa Area Vocational Rehabilitation Center (AVRC) II sa Department of Social Welfare and Development (DSWD) sa Central Visayas. Pinaagi sa "Adopt-A-Center"nga programa sa DSWD Partnerships Building and Resource Mobilization Office, giila sa Bingo Plus ang AVRC II isip usa sa ilang mga benepisyaryo sa "Future Smart E-Plus Center Program," nga nagtumong sa pagpalambo sa digital literacy sa ilang napilian nga non-residential ug residential care nga mga pasilidad.

Atol sa Bingo Plus Day Carnival nga gipahigayon sa SM Seaside Cebu, ang Bingo Plus Foundation, Inc. ni turnover sa 20 ka desktop computers, tarpaulin printer, ug heat press machine ngadto sa AVRC II, usa ka pasilidad sa pagbansay alang sa mga Persons with Disability (PWD). Matud ni AVRC II OIC-Center Head, Florita Q. Dabon, nga pinaagi niining mga nadugang sa ilang ekipo, mahimo nilang mas mabansay ang ilang mga kliyente sa paggamit sa labing bag-o ug uso nga mga teknolohiya sa komersyal nga pag-imprinta.

Si DSWD- 7 Assistant Regional Director for Operations Juanito C. Cantero nagpasalamat sa mga donor nga nagpakita sa tinuod nga pag-atiman sa sektor ug nilaom nga kining paningkamot makamugna og umaabot nga kolaborasyon sa DSWD ug sa grupo.

Ang seremonyas sa pag-turnover sa mga ekipo gitambungan usab nilang DigiPlus Interactive Corp. President Andy Tsu, Vice President for Investor, Corporate Communications, and Sustainability Celeste Jovenir, ug AB Leisure Exponent Inc. President Rafael Jasper Vicencio. (BANAT NEWS)