Usa patay human nahilo sa baho sa septic tank

CEBU, Philippines — Upat ka trabahador ang nangahilo sa baho ug  usa kanila ang namatay samtang nagtrabaho diha ilawom sa septic tank sa merkado publiko sa Lungsod sa Dumanjug niadtong Martes sa buntag.

Ang namatay giila nga si Mark Gil Eniego, 28-anyos ug lakip sa nangahilo mao sila si Jerome Merenillo, Eddie Marie Rellorta Aranda ug Jureme Saberon Amit, parehong hingkod ang panuigon.

Daling gidala diha sa Barili District Hospital ang mga biktima apan si Eniego gideklara kini sa doktor nga patay na nga naabot sa maong tambalanan gumikan sa acute respiratory distress secondary to toxic inhalation injury samtang luwas ra ang kahimtang sa tulo niini ka kauban.              

Gikataho nga si Eniego ug Merenillo adunay gi-welding sulod sa septic tank apan ang nauna kalit kining nawagtangan og panimuot gumikan sa baho sa kemikal diha sa ilawom.

Si Aranda ug Amit ang nisulay sa pagluwas nila ni Eniego ug Merenillo apan tungod sa kaisog sa baho deriyot usab sila mawagtangi og panimuot.

Si Merenillo ang nakagawas gikan sa septic tank samtang si Eniego ang nahibilin kini diha sa ilawom.

Ang ubang mga trabahate nikuha kini og blower gikan sa ilang bodega aron adunay ventilation sa sulod.

Ang Dumanjug Police Station nakadawat og alarma sa maong hitabo pasado na alas 12:00 sa udto. Nasuta nga si Eniego nagpurong lang kini og sinina nga nisulod sa septic tank ug wala kini magsul-ob og Personal Protective Equipment (PPE).

Gikataho nga adunay sulod nga napundong hinugas nga tubig gikan sa merkado ang tapad nga tangke sa septic tank nga posibleng hinungdan sa baho nga nialisngaw. —Irish L. Laborte, CNU Intern/BDB BANAT NEWS