Gipatay tungod sa koleksyon

CEBU, Philippines — Tungod sa koleksyon sa bayad sa parking area usa ka 63-anyos nga senior citizen ang gipusil sa Sitio Cabancalan II, Barangay Bulacao, siyudad sa Sugbo kagahapon sa alas-10 sa buntag.

Ang biktima nga si Juan Ordeñiza, 63, residente sa Barangay Bulacao ning siyudad gipusil dili lang sa lawas apan apil na ang iyahang ulo.

Nag-inusara ra matud pa ang suspetsado nga nailhan sa ngalan nga alyas Perot. Nasayran nga sa wala pa gipusil ang biktima nag-inom kini sulod sa parking                 area.

Sigon sa iyang kainom nga 67-anyos nga senior citizen nga gihagad siya og inom sa biktima human nakapamahaw.

Pabalik na unta ang biktima sa parking area  dala ang ilimnong makahubog diha sa entrada sa parkingan gipusil kini kaduha diha sa bukobuko ug sa ulo sa nag-inusarang suspetsado nga galakaw nga nisunod                                                     kaniya.

Matud ni Police Major Jiceree Basitao, hepe sa Inayawan Police Station 7 nga nailhan na nila ang suspetsado ug padayon ang ilang hot pursuit operation. Matud pa nga nagkabikil ang biktima ug ang suspek tungod sa bahinay sa kita sa parkingan. — IBM BANAT NEWS