CCPO nag-monitor sa mga namaligya ug namuhat og peke nga kwarta

CEBU, Philippines —  Padayon ang monitoring sa Cebu City Police Office (CCPO) kabahin sa mga tawo nga mamaligya ug namuhat og peke nga kwarta tungod kay anaa sila’y impormasyon nga nadawat nga aduna gihapo’y naghimo sa maong ilegal nga kalihokan.

Si CCPO Director Police Colonel Ireneo Dalogdog nagkanayon nga ang katawhan angayan nga magmatngon sa kalahian sa tinuod ug peke nga kwarta ilabi na nga kasagaran sa gamiton sa mga mangingilad ang P1,000 bill aron masinsilyohan.

Gipasabot ni Dalogdog nga pipila sa mga pamaagi aron mahibaw-an kon ang kwarta tinuod mao nga i-feel ang texture sa kwarta kon kkni adunay rough security paper, embossed print ug Raised Tactile Marks (Enhanced New Generation Currency or eNGC banknotes).

Tan-awon ang mga mosunod nga security features sa pag-inspect sa kwarta sama sa watermark or shadow image sa portrait, security fibers, security thread, asymmetric serial number, see-through mark.

Itakilid sa isig ka kilig ang kwarta aron masusi ang mosunod nga security features sama sa windowed security thread, concealed numerical value, optically variable ink (1000-piso NGC banknote, and for 1000- and 500-piso eNGC banknotes), Optically variable device patch (1000- and 500-Piso NGC banknotes, and 1000-piso eNGC banknotes), enhanced value panel (1000- and 500-piso eNGC banknotes).

“Pahimangno sa katawhan sa siyudad sa Sugbo katong fake money ginagamit ni siya sa mga gagmay nga mga tindahan mopalit ni sila didto sa mga merkado, sa mga sari-sari store unya ang ilaha pod amount nga ilahang gipalit ginagmay ra P50, P100 kay kadtong kambiyo ato mao toy ilahang ginansiya sa pagpamaligya or paggamit aning fake money”, matud ni Dalogdog.

Si Dalogdog nagkanayon nga ang mga mangingilad dili mopalit sa malls tungod kay anaa man sila’y kapasidad nga moila sa peke nga kwarta gamit ang machine.

Gipadayag ni Dalogdog nga sa ilahang namatikdan manggawas ang peke nga kwarta kon adunay mga dagkong okasyon sama sa pasko, sinulog ug eleksiyon. — BDB (BANATNEWS)