Daluz magpabiling chairman
CEBU, Philippines — Nalahukom ang board members sa Metropolitan Cebu Water District (MCWD), atol sa ilang session kagahapon nga ipadaplin ang request ni Cebu City Mayor Michael Rama nga “legal formalities” alang sa pagpalingkod kang Engr. Miguelito Pato isip bag-ong chairman sa maong water district.
Kini nagpasabot nga magpabilin gihapon nga chairman sa board si Atty. Jose Daluz III ilabi na nga walay nahitabong pagbakante sa maong posisyon ug wala pu’y piniliay nga nahitabo.
Suma pa sa tigpamaba sa MCWD nga si Minerva Gerodias nga wala pa’y nadawat nga tubag gikan sa City Hall ang tulo ka sakop sa board mga sila si Daluz, Pato, ug Judelyn May Seno nga gipadalhan og show cause order sa city hall ug gipangayoan kini og explanation kun nganong dili sila angayan nga tangtangon isip chairman ug miyembro sa board. Aduna kini kalabotan kaniadto sa petisyon sa niaging tuig sa mga empleyado sa MCWD nga naghangyo sa tulo nga mokanaog sa puwesto.
Ang tulo ka sakop sa board kay gipadalhan og suwat niadtong Mayo 22, ,ug gitubag nila kini niadtong Mayo 26.
Nagkanayon Gerodias nga nagpaabot gihapon ang MCWD sa tubag sa city hall.
Kahinumdoman nga giklaro ni Daluz nga walay gahom ang mayor sa pagtudlo og bag-ong chairman sa MCWD sanglit kinahanglan kini nga mag-agi og eleksyon nga salmotan sa mga sakop sa board.
Una nga gitataw sa maong water district nga luyo sa mga gisagobang nga isyu , gipasalig sa management nga magpadayon ang ilang normal nga operasyon.
Nakaponting usab sila karon sa ilang papel ilabi na sa ilang mandato ngadto sa katawhan alang sa pag-apod apod og tubig .
Aduna pud sila’y lapad nga pagpangandam kalabot sa hulga sa El Niño.— IBM (BANATNEWS)
- Latest